ఏప్రిల్ మొదటి వారంలో భూ భారతి చట్టం కొత్త రూల్స్: మంత్రి పొంగులేటి

హైదరాబాద్, తెలంగాణ రాష్ట్ర భూ పాలనలో కీలక మార్పులకు తెరతీసేలా కాంగ్రెస్ ప్రభుత్వం కొత్త భూ భారతి చట్టాన్ని అమల్లోకి తీసుకొచ్చింది. గత ప్రభుత్వం అమలు చేసిన ధరణి వ్యవస్థను రద్దు చేసి, భూ వ్యవహారాల్లో పారదర్శకత తీసుకురావడమే లక్ష్యంగా భూ భారతి వెబ్ పోర్టల్ ప్రారంభించనుంది.

ఈ పోర్టల్‌ను ఈ నెలాఖరులో ముఖ్యమంత్రి రేవంత్ రెడ్డి ప్రారంభించే అవకాశముందని సమాచారం. భూ భారతి చట్టానికి సంబంధించిన నిబంధనలు, ఇతర కీలక విషయాలపై రెవెన్యూశాఖ మంత్రి పొంగులేటి శ్రీనివాస్ రెడ్డి ప్రకటన చేశారు.

ఏప్రిల్‌లో భూ భారతి చట్టం నిబంధనలు విడుదల

మంత్రి పొంగులేటి శ్రీనివాస్ రెడ్డి మాట్లాడుతూ, ఏప్రిల్ మొదటి వారంలో భూ భారతి చట్టం నిబంధనలను విడుదల చేస్తామని తెలిపారు. భూముల మార్కెట్ విలువను సమీక్షించి కొత్త మార్గదర్శకాలను రూపొందించనున్నట్లు చెప్పారు.

సాదా బైనామాలపై స్పష్టత:

గతంలో దాఖలు చేసిన సాదా బైనామా అప్లికేషన్లను పరిష్కరిస్తామనీ, కానీ కొత్తగా సాదా బైనామాలను స్వీకరించబోమని మంత్రి స్పష్టం చేశారు.
భూ విక్రయాల్లో అక్రమాలను అరికట్టడమే ఈ నిర్ణయానికి కారణంగా తెలిపారు.

ఎల్ఆర్ఎస్‌కు సంబంధించి తాజా అప్‌డేట్స్

లే అవుట్ రెగ్యులరైజేషన్ స్కీమ్ (ఎల్ఆర్ఎస్) ప్రక్రియ వేగంగా కొనసాగుతోందని మంత్రి తెలిపారు.

25% రాయితీ ఈ నెలాఖరుతో ముగుస్తుందని పేర్కొన్నారు.
రాయితీ గడువును పొడిగించేదా అనే అంశంపై ఇంకా నిర్ణయం తీసుకోలేదని స్పష్టం చేశారు.
ఎల్ఆర్ఎస్ ఫీజు చెల్లించిన ప్రతి దరఖాస్తుదారునికి మున్సిపల్ అడ్మినిస్ట్రేషన్ శాఖ ధ్రువీకరణ పత్రం అందజేస్తుందని మంత్రి తెలిపారు.

అసైన్డ్ భూముల యాజమాన్య హక్కులపై త్వరలో నిర్ణయం

భూ భారతి చట్టం అమల్లోకి వచ్చిన తర్వాత అసైన్డ్ భూముల యాజమాన్య హక్కుల విషయమై స్పష్టమైన విధానాన్ని రూపొందిస్తామని మంత్రి పొంగులేటి వెల్లడించారు.
గ్రామాల్లో పాత వీఆర్వో, వీఆర్ఏలను తిరిగి నియమించే అవకాశం ఉందని, వారికి ఇంటర్ విద్యార్హతను అర్హతగా నిర్ణయించనున్నట్లు తెలిపారు.
ఈ నియామకాలకు సంబంధించి తెలుగులోనే పరీక్ష నిర్వహించనున్నామని, 10,000 పోస్టులకు 6,000 మందికి పరీక్ష నిర్వహించే అవకాశం ఉందని వెల్లడించారు.

భూ భారతి చట్టంతో భూసమస్యల పరిష్కారం వేగంగా జరుగుతుందని, భూముల రిజిస్ట్రేషన్, మార్కెట్ విలువల సవరణ, ఎల్ఆర్ఎస్, సాదా బైనామా వంటి అంశాల్లో ప్రభుత్వం పారదర్శక విధానం పాటిస్తుందని మంత్రి పొంగులేటి శ్రీనివాస్ రెడ్డి స్పష్టం చేశారు. ఏప్రిల్ మొదటి వారంలో రూల్స్ విడుదలయ్యేంతవరకు భూస్వాములు, కొనుగోలుదారులు వేచి చూడాల్సి ఉంటుంది.