ఏప్రిల్ 14 నుంచి తెలంగాణలో ‘భూ భారతి’ అమలు – రైతులకు సులభతరం!

హైదరాబాద్: తెలంగాణ ప్రభుత్వం ఆవిష్కరించిన "భూ భారతి చట్టం" ఈ నెల ఏప్రిల్ 14న అంబేద్కర్ జయంతి సందర్భంగా అధికారికంగా అమల్లోకి రానుంది. ఈ కొత్త చట్టం రైతుల భూ హక్కుల రికార్డులను మరింత పారదర్శకంగా, సులభంగా నిర్వహించేందుకు రూపొందించబడింది.

దశల వారీగా అమలు – కొత్త వెబ్‌సైట్, యాప్

భూ భారతి చట్టాన్ని ఒకేసారి కాకుండా ఫేజ్‌ల వారీగా అమలుచేయాలని ప్రభుత్వం నిర్ణయించింది. మొదటి దశలో 6 మాడ్యూల్స్‌తో కూడిన వెబ్‌సైట్ అందుబాటులోకి రానుంది. ఇది ప్రస్తుతం ఉన్న ధరణి పోర్టల్ కంటే వేగంగా పనిచేస్తుందని, అలాగే యూజర్ ఫ్రెండ్లీగా ఉంటుందని అధికారులు చెబుతున్నారు. ఇకపై భూమి సంబంధిత అప్లికేషన్లు వేయడం మరింత సులభం కానుంది.

పోర్టల్ లాంచ్‌కు ప్రత్యేక ఏర్పాట్లు

శిల్పకళావేదిక, హైద‌రాబాద్‌లో జరిగే కార్యక్రమంలో ముఖ్యమంత్రి రేవంత్ రెడ్డి భూ భారతి పోర్టల్‌ను లాంచ్ చేయనున్నారు. ఈ కార్యక్రమానికి సంబంధించి రంగారెడ్డి కలెక్టర్, సైబరాబాద్ పోలీస్ కమిషనర్, శిల్పారామం ప్రత్యేక అధికారులను సీసీఎల్ఏ నవీన్ మిట్టల్ ఏర్పాట్ల కోసం ఆదేశించారు.

అప్పీల్ వ్యవస్థ – గ్రామ స్థాయిలోనే న్యాయం

ధరణిలో ఏదైనా అప్లికేషన్ తిరస్కరించబడితే కోర్టులపై ఆధారపడాల్సి వచ్చేది. కానీ భూ భారతి చట్టంలో తహసీల్దార్, ఆర్డీవో, కలెక్టర్ స్థాయిలో అప్పీల్ అవకాశం ఉండటంతో రైతులు తక్కువ ఖర్చుతో, తక్కువ సమయంలోనే న్యాయం పొందగలుగుతారు.

నూతన చాట్‌బాట్, యాప్ – రైతులకు మరింత తోడ్పాటు

భూ భారతి పోర్టల్‌లో రైతులకు ఏ సందేహాలున్నా తేలికగా పరిష్కరించేందుకు చాట్‌బాట్ అందుబాటులోకి రానుంది. ఈ చాట్‌బాట్ ద్వారా:

• ఏ సమస్యకు ఏ అప్లికేషన్ వేయాలి?
• అవసరమైన డాక్యుమెంట్లు ఏమిటి?
• చట్టంలోని హక్కులు, ప్రయోజనాలు ఏమిటి?

అన్నీ స్పష్టంగా తెలుసుకోవచ్చు. దీని తో రైతులు ప్రభుత్వ కార్యాలయాలకు తిరగాల్సిన అవసరం తక్కువగా ఉంటుంది. స్పెషల్ యాప్లో ప్రతి రైతుకు సంబంధించిన భూ వివరాలు టెంపరరీ భూధార్ నంబర్ ఆధారంగా చూపించనున్నారు.

భవిష్యత్తులో దిశ

2023 డిసెంబర్లో అసెంబ్లీ, కౌన్సిల్లో ఆమోదం పొందిన భూ భారతి బిల్లు, 2024 జనవరిలో గవర్నర్ ఆమోదం పొందింది. జనవరి 20న అధికారిక గెజిట్ విడుదలైంది. ఈ చట్టం ద్వారా పారదర్శక భూ రికార్డులు, వేగవంతమైన సేవలు, అర్హత గల రైతులకు న్యాయం అందడం ప్రభుత్వ లక్ష్యం.