ఉద్యోగ భర్తీ ప్రక్రియకు శ్రీకారం చుట్టిన రేవంత్ రెడ్డి ప్రభుత్వం

 

నిరుద్యోగులకు శుభవార్త: ఉద్యోగ భర్తీ ప్రక్రియకు శ్రీకారం చుట్టిన రేవంత్ రెడ్డి ప్రభుత్వం

హైదరాబాద్: తెలంగాణ నిరుద్యోగులకు రేవంత్ రెడ్డి నేతృత్వంలోని రాష్ట్ర ప్రభుత్వం గొప్ప వార్త అందించింది. ఎస్సీ వర్గీకరణ ప్రక్రియ పూర్తయిన నేపథ్యంలో, ఉద్యోగాల భర్తీకి రాష్ట్ర ప్రభుత్వం నాంది పలికింది. ఈ ఏప్రిల్ నెలలోనే నియామక ప్రకటనలు జారీ చేసే ప్రణాళికతో ముందుకెళ్తోంది.

ప్రభుత్వ శాఖల వారీగా ఖాళీగా ఉన్న పోస్టుల గుర్తింపు ఇప్పటికే ప్రారంభమైంది. మొత్తం దాదాపు 20,000 ప్రభుత్వ ఉద్యోగాల భర్తీకి అవకాశాలు కనిపిస్తున్నాయి. ఈ మేరకు రేవంత్ రెడ్డి ప్రభుత్వం ప్రతీ ఏడాది ఉద్యోగాల క్యాలెండర్ విడుదల చేయాలని నిర్ణయించుకుంది. 2024-25 సంవత్సరానికి ఉద్యోగ క్యాలెండర్ ఇప్పటికే విడుదల చేసినా, ఎస్సీ వర్గీకరణ అంశంపై న్యాయస్థానం తీర్పు రావడం వరకు నోటిఫికేషన్లు నిలిపివేసిన విషయం తెలిసిందే.

గత ఏడాది సెప్టెంబర్ నుంచి కొత్త నియామక ప్రకటనలు రాకపోయిన నేపథ్యంలో, ఈ నెల 14న ఎస్సీ వర్గీకరణ అమల్లోకి వచ్చిందన్న నేపథ్యంలో, ప్రభుత్వం మరోసారి ఉద్యోగాల ఖాళీలను గుర్తించేందుకు చర్యలు తీసుకుంది.

విభాగాల వారీగా చూస్తే, ఆర్టీసీ, వైద్య ఆరోగ్య శాఖలలోనే దాదాపు 10,000 ఉద్యోగాలు భర్తీ అయ్యే అవకాశం ఉంది. గ్రూప్-1 ప్రకటన కోసం సంబంధిత అధికారులు పోస్టులను గుర్తించడానికి కసరత్తు ప్రారంభించారు. గ్రూప్-4, పోలీసు విభాగాలలోనూ వేల సంఖ్యలో ఖాళీలు ఉన్నట్లు సమాచారం. ఇది కాకుండా, గ్రూప్ 1, 2, 3, 4 ఉద్యోగాలు, పోలీసు శాఖ, గురుకుల విద్యా సంస్థల రిక్రూట్మెంట్ బోర్డుల ద్వారా కూడా నోటిఫికేషన్లు విడుదల కానున్నాయి. ఏ శాఖలో ఎప్పుడు పరీక్షలు నిర్వహించాలన్న దానిపై త్వరలోనే ప్రభుత్వం స్పష్టత ఇవ్వనుంది.

మహిళా శిశు సంక్షేమ శాఖలో 14,236 అంగన్‌వాడీ పోస్టులు, ఆరోగ్య శాఖలో 4,000కి పైగా ఉద్యోగాల నోటిఫికేషన్లు ఏప్రిల్‌లోనే విడుదల చేయాలన్నది సర్కారు ప్రణాళిక. ఈ నిర్ణయాలతో నిరుద్యోగ యువతలో కొత్త ఆశలు మెరుగుతున్నాయి. ప్రభుత్వ ఉద్యోగాల కోసం ఎదురుచూస్తున్న వారికి ఇది నిజంగా శుభవార్త.