మరి కొద్ది గంటల్లో భారత్‌కు ముంబై పేలుళ్ల సూత్రధారి
2008లో దేశాన్ని దెబ్బతీసిన ముంబై ఉగ్రదాడులకు సంబంధించి కీలక నిందితుడైన తహవూర్ హుస్సేన్ రాణా భారత్‌కు తరలింపు తుది దశకు చేరుకుంది. ఈ కేసులో ప్రధాన పాత్ర పోషించిన రాణాను భారత్‌కు అప్పగించాలన్న భారత ప్రభుత్వ విజ్ఞప్తిని అడ్డుకునేందుకు ఆయన వేసిన పిటిషన్లను అమెరికా సుప్రీంకోర్టు తిరస్కరించింది. దీంతో రాణాను భారత్‌కు అప్పగించేందుకు అమెరికా సిద్ధమయ్యింది.
అమెరికా సుప్రీంకోర్టు తీర్పుతో గ్రీన్ సిగ్నల్
తహవూర్ రాణా వేసిన పలు హ్యాబియస్ కార్పస్ పిటిషన్లను అమెరికా కోర్టులు ఇప్పటికే తిరస్కరించగా, చివరికి ఆయన ఆశలన్నీ అమెరికా సుప్రీంకోర్టు వద్ద ముగిసిపోయాయి. దీంతో న్యాయ ప్రక్రియ ముగిసిందని స్పష్టం అయింది. ప్రస్తుతం ఆయనను భారత్‌కు అప్పగించేందుకు అన్ని ఏర్పాట్లు పూర్తి చేశారు.
ప్రత్యేక విమానంలో భారత్‌కు రాణా తరలింపు
అధికార వర్గాల సమాచారం ప్రకారం, తహవూర్ రాణాను ప్రత్యేక విమానంలో భారత్‌కు తరలిస్తున్నారు. ఈ రాత్రి లేదా రేపు తెల్లవారుజామున ఆయన భారత్‌కు రానున్నారని సమాచారం. అప్పగింపు ప్రక్రియకు సంబంధించి భారత భద్రతా ఏజెన్సీలు అప్రమత్తమయ్యాయి.
మోదీ-ట్రంప్ మధ్య కీలక చర్చల ఫలితం
తహవూర్ రాణా భారత్‌కు అప్పగింపుపై గతంలో భారత ప్రధాని నరేంద్ర మోదీ, అప్పటి అమెరికా అధ్యక్షుడు డొనాల్డ్ ట్రంప్‌తో చర్చలు జరిపారు. అమెరికా పర్యటన సందర్భంగా మోదీ ఈ విషయాన్ని ట్రంప్ దృష్టికి తీసుకెళ్లగా, ఆయన సానుకూలంగా స్పందించారు. ఈ అంశాన్ని ఇద్దరూ సంయుక్త మీడియా సమావేశంలో ప్రకటించారు.
ముంబై దాడుల్లో కీలక పాత్రధారి
2008 నవంబర్‌లో ముంబై నగరంలో జరిగిన ఉగ్రదాడుల్లో తహవూర్ రాణా కీలక పాత్ర పోషించినట్లు విచారణలో బయటపడింది. డేవిడ్ కోల్మన్ హెడ్లీ అనే పాక్-అమెరికన్ ఉగ్రవాదికి రాణా సహాయపడినట్లు సమాచారం. లష్కరే తోయిబా సంస్థతో రాణాకు సంబంధాలున్నాయని ఆధారాలు వెలుగుచూశాయి.
పదేళ్లుగా అమెరికా జైలులో
తహవూర్ రాణా గత పదేళ్లుగా అమెరికాలో ఉగ్రవాద కార్యకలాపాలకు సంబంధించి శిక్ష అనుభవిస్తున్నారు. ఇప్పుడు అన్ని న్యాయ ప్రక్రియలు పూర్తయ్యిన నేపథ్యంలో, అతనిని భారత్‌కు అప్పగించడం ద్వారా ముంబై దాడుల విచారణకు కొత్త దిక్సూచి లభించనుంది.
Post a Comment