బిఆర్ఎస్, బిజెపి నేతల హౌస్ అరెస్ట్

హైదరాబాద్ సెంట్రల్ యూనివర్సిటీ భూముల వివాదం రాజకీయం వేడెక్కింది. ఈ వివాదంపై విద్యార్థులు గత కొన్ని రోజులుగా నిరసనలు చేపడుతుండగా, వారికి మద్దతుగా బీజేపీ, బీఆర్ఎస్ నేతలు మంగళవారం యూనివర్సిటీకి వెళ్లాలని ప్రకటించారు.

అయితే, పరిస్థితి ఉద్రిక్తంగా మారే అవకాశం ఉండడంతో పోలీసులు ముందస్తు చర్యలు చేపట్టారు. హైదరాబాద్‌లో బీజేఎల్పీ నేత మహేశ్వర్ రెడ్డి, బీఆర్ఎస్ వర్కింగ్ ప్రెసిడెంట్ కేటీఆర్ నివాసాల వద్ద భారీగా పోలీసులు మోహరించారు. ముందస్తుగా వారిని హౌస్ అరెస్ట్ చేశారు.

ప్రభుత్వం వేలం వేయాలని నిర్ణయించిన హెచ్‌సీయూ భూములను పరిశీలించేందుకు బీజేపీ నేతలు కేంద్ర మంత్రులు కిషన్ రెడ్డి, బండి సంజయ్, ఎంపీలు ఈటల రాజేందర్, కొండా విశ్వేశ్వర రెడ్డి, మహేశ్వర్ రెడ్డి, రాకేశ్ రెడ్డి నేతృత్వంలో యూనివర్సిటీని సందర్శించాలని నిర్ణయించారు. అయితే, పోలీసులు వారిని అడ్డుకోవడంతో ఉద్రిక్తత నెలకొంది.

విద్యార్థులపై జరిగిన లాఠీచార్జీలో గాయపడిన ఏబీవీపీ విద్యార్థులను పరామర్శించేందుకు నేతలు ప్రయత్నించారు. అలాగే, ప్రభుత్వం చదును చేస్తున్న 400 ఎకరాల భూములను పరిశీలించాలని అనుకున్నారు. అయితే, పోలీసుల హౌస్ అరెస్ట్ చర్యలను బీజేపీ, బీఆర్ఎస్ నేతలు తీవ్రంగా ఖండించారు.

ఈ ఘటనకు సంబంధించి రాజకీయంగా పెద్ద చర్చ నడుస్తోంది. ప్రభుత్వం తీసుకున్న నిర్ణయంపై ప్రతిపక్ష పార్టీలు తీవ్ర అసంతృప్తి వ్యక్తం చేస్తున్నాయి. పోలీసులు అధికార పార్టీ ఆదేశాలకు లోబడి వ్యవహరిస్తున్నారని బీజేపీ, బీఆర్ఎస్ నేతలు ఆరోపిస్తున్నారు. మరోవైపు, ప్రభుత్వం మాత్రం శాంతి భద్రతల పరిరక్షణ కోసం చర్యలు తీసుకున్నామని చెబుతోంది. ఈ వివాదం ఎలా మలుపు తీసుకుంటుందో వేచి చూడాలి.