వరంగల్‌లో మహిళా కానిస్టేబుల్ ఆత్మహత్య – మానసిక వేదన కారణమా?
వరంగల్ జిల్లా కాజీపేట దర్గా ప్రాంతంలో మరో విషాద ఘటన చోటు చేసుకుంది. అర్చన అనే మహిళా కానిస్టేబుల్ తన నివాసంలో చీరతో ఉరివేసుకుని ఆత్మహత్య చేసుకున్న ఘటన కలకలం రేపుతోంది. ఆమె తీసుకున్న ఈ తీవ్ర నిర్ణయం వల్ల పోలీస్ శాఖలో తీవ్ర విషాదం నెలకొంది.
అర్చన 2022లో వివాహం చేసుకుంది. అయితే వివాహం కొన్ని రోజుల్లోనే విఫలమై విడాకులు తీసుకోవాల్సి వచ్చింది. అప్పటి నుంచి ఆమె తీవ్ర మానసిక వేదనకు గురైందని సమాచారం. వ్యక్తిగత జీవితంలో ఎదురైన సమస్యలు, ఒత్తిడులు ఆమెను తీవ్రంగా ప్రభావితం చేసినట్టు అనుమానిస్తున్నారు.
ఇటీవల నీలిమ అనే మహిళా కానిస్టేబుల్ కూడా వరంగల్ జిల్లాలోనే నిలిబండ తండాలో పెళ్లి సంబంధాలు సరిగా లేకపోవడంతో ఆత్మహత్య చేసుకోవడం గుర్తు తెస్తోంది. వరుసగా మహిళా కానిస్టేబుళ్ల ఆత్మహత్యలు పోలీసు శాఖలో ఆందోళనకు గురి చేస్తున్నాయి.
అర్చన ఆత్మహత్యకు గల కారణాలపై పోలీసులు దర్యాప్తు ప్రారంభించారు. మృతదేహాన్ని పోస్టుమార్టం కోసం తరలించగా, కుటుంబ సభ్యులు, సన్నిహితులు తీవ్ర విషాదంలో మునిగిపోయారు. మానసిక ఒత్తిడికి గురయ్యే పోలీస్ సిబ్బందికి మద్దతు, కౌన్సెలింగ్ వంటి చర్యలు తీసుకోవాల్సిన అవసరం ఎంతైనా ఉందని పలువురు అభిప్రాయపడుతున్నారు.
Post a Comment