న్యాయవాదిపై దాడికి నిరసనగా విధుల బహిష్కరణ

తెలంగాణ చౌరస్తాలో ఆందోళన, నినాదాలతో హోరెత్తించిన న్యాయవాదులు

హైదరాబాద్ సిటీ సివిల్ కోర్టులో న్యాయవాది సయ్యద్ మస్తాబా అలీపై ఇటీవల జరిగిన దాడి ఘటనపై రాష్ట్రవ్యాప్తంగా న్యాయవాదుల లో తీవ్ర ఆగ్రహం వ్యక్తమవుతోంది. ఈ దాడిని నిరసిస్తూ మంగళవారం మహబూబ్ నగర్ జిల్లాలో న్యాయవాదులు విధులను బహిష్కరించి నిరసన కార్యక్రమాన్ని నిర్వహించారు.

న్యాయవాదుల సంఘం అధ్యక్షుడు అనంతరెడ్డి ఆధ్వర్యంలో ఈ నిరసన కార్యక్రమం శాంతియుతంగా సాగింది. న్యాయవాదులు నల్ల బ్యాడ్జీలు ధరించి కోర్టు ప్రాంగణంలో నుంచి ర్యాలీగా బయలుదేరి తెలంగాణ చౌరస్తా వరకు నినాదాలతో కూడిన ప్రదర్శన చేశారు. “న్యాయవాదులపై దాడులు ఆపాలి”, “వెంటనే న్యాయవాదుల రక్షణ చట్టం తీసుకురావాలి” అంటూ నినాదాలతో ప్రదర్శన ప్రాంతాన్ని హోరెత్తించారు.

ఈ నిరసనలో సీనియర్, జూనియర్, మహిళ న్యాయవాదులు పెద్ద సంఖ్యలో పాల్గొన్నారు. సంఘం అధ్యక్షుడు అనంతరెడ్డి మాట్లాడుతూ, "ఇటీవల కాలంలో న్యాయవాదులపై దాడులు పెరుగుతున్నాయి. ఇది అత్యంత ఆందోళనకరమైన పరిణామం. న్యాయ వ్యవస్థ రక్షణలో ఉండాల్సిన న్యాయవాదులే హింసకు గురవుతున్న పరిస్థితిని ప్రభుత్వం గమనించాలి" అని పేర్కొన్నారు.

దాడులపై ప్రభుత్వం వెంటనే స్పందించి ప్రత్యేక న్యాయవాదుల రక్షణ చట్టాన్ని అమలు చేయాలని ఆయన డిమాండ్ చేశారు. అలాగే, సయ్యద్ మస్తాబా అలీపై దాడికి పాల్పడిన దుండగులను శీఘ్రమే అరెస్ట్ చేసి కఠినంగా శిక్షించాలని కోరారు.

ఈ కార్యక్రమంలో న్యాయవాదుల సంఘం ప్రధాన కార్యదర్శి శ్రీధర్ రావు, ఉపాధ్యక్షుడు వెంకటయ్య, కోశాధికారి వెంకట్రావు, సంయుక్త కార్యదర్శి నాగోజి, తదితర న్యాయవాదులు పాల్గొన్నారు. ప్రదర్శన అనంతరం చౌరస్తా వద్ద సత్యాగ్రహ రూపంలో నిరసన తెలుపుతూ సభ కూడా నిర్వహించారు.