శ్రీరామ పట్టాభిషేక మహోత్సవం రాష్ట్ర గవర్నర్ జిష్ణుదేవ్ వర్మ పట్టు వస్త్రాలు సమర్పణ
భద్రాచలం ఆలయం మరోసారి భక్తిశ్రద్ధలతో నిండిపోయింది. దక్షిణ అయోధ్యగా ఖ్యాతిగాంచిన భద్రగిరిలో జరిగిన శ్రీరామ పట్టాభిషేకం వేడుకలు అద్భుతంగా సాగాయి. అర్చకుల వేద మంత్రోచ్ఛారణలతో మిథిలా ప్రాంగణం మంగళధ్వనులతో మార్మోగింది. "తక్కువేమీ మనకు రాముడు ఒక్కడున్నాడు" అంటూ భక్తుల రామనామ స్మరణలు గగనాన్ని చీల్చాయి.
శ్రీ సీతారాముల కళ్యాణం తరువాత జరిగిన పట్టాభిషేక మహోత్సవం అత్యంత వైభవంగా జరిగింది. తెలంగాణ రాష్ట్ర గవర్నర్ జిష్ణుదేవ్ వర్మ ఈ ఉత్సవానికి ముఖ్య అతిథిగా హాజరై, స్వామివారికి పట్టు వస్త్రాలు సమర్పించారు. ముందుగా ఆలయంలో స్వామివారిని దర్శించి ప్రత్యేక పూజలు నిర్వహించారు.
మిథిలా ప్రాంగణంలో నిర్వహించిన ఈ వేడుకలో తొలుత అర్చకులు స్వామివారి పాదుకలకు అభిషేకం నిర్వహించారు. గౌతమీ నదీ తీరం నుంచి తీర్థములు తెప్పించటం, భజంత్రీల శబ్దంతో ఊరేగింపు, శిల్పకళా శోభిత కళ్యాణ మండపంలో స్వామివారి ఆసనం – ఇవన్నీ భక్తుల మనసుల్ని పరవశింపజేశాయి.
ఈ సందర్భంగా విశ్వక్సేన ఆరాధన, పుణ్యాహవాచనం నిర్వహించగా, స్వామివారికి పాదుకలు, రాజదండం, స్వర్ణ కిరీటం, ఖడ్గం, రత్నాభరణాలు అలంకరించారు. తదుపరి శ్రీరామ పట్టాభిషేక పారాయణం, వేద పారాయణలు (ఋగ్వేద, యజుర్వేద, సామవేద, ఆదరణ వేదం), విష్ణు పురాణం, భగవత్ శాస్త్రం లాంటి గ్రంధ పఠనాలు జరిగాయి. పుష్కర నదీ జలాలతో మహాకుంభ తీర్థప్రోక్షణ, హారతులు, స్తోత్రాల పారాయణం వేడుకలో భక్తులకు అద్భుత అనుభూతిని కలిగించాయి.
ఈ మహోత్సవానికి రాష్ట్ర వ్యవసాయ మంత్రి తుమ్మల నాగేశ్వరరావు, భద్రాచలం ఎమ్మెల్యే డాక్టర్ తెల్లం వెంకట్రావు, ఇల్లందు ఎమ్మెల్యే కోరం కనకయ్య, జిల్లా కలెక్టర్ జితేష్ పటేల్, ఎస్పీ రోహిత్ రాజ్, ఐటీడీఏ పీఓ రాహుల్, ఈవో రమాదేవి తదితర అధికారులు హాజరయ్యారు. గవర్నర్ పర్యటన సందర్భంగా పోలీసులు కట్టుదిట్టమైన భద్రత ఏర్పాట్లు చేశారు. భారత దేశం నలుమూలల నుంచి తరలివచ్చిన భక్తులు ఈ పవిత్ర ఘట్టానికి సాక్షులై ఆనందంతో, తీపి జ్ఞాపకాలతో వెనుదిరిగారు. వేడుకల విజయవంతం కావడంలో జిల్లా కలెక్టర్, ఎస్పీ కీలక పాత్ర పోషించారు.
Post a Comment