ఎల్పీజీ ధరలు వెంటనే తగ్గించాలి: సదాశివపేటలో CPI నిరసన

సదాశివపేట, ఇటీవల కేంద్ర ప్రభుత్వం ఎల్పీజీ గ్యాస్ సిలిండర్ పై రూ.50 పెంచిన నేపథ్యంలో, సిపిఐ (కమ్యూనిస్టు పార్టీ ఆఫ్ ఇండియా) ఆధ్వర్యంలో సదాశివపేటలో గ్యాస్ సిలిండర్ తో నిరసన కార్యక్రమం నిర్వహించారు. ఈ సందర్భంగా సిపిఐ జిల్లా కార్యవర్గ సభ్యులు ఎం.తాజుద్దీన్ మాట్లాడుతూ, "ఈ పెంపు పేద, మధ్యతరగతి ప్రజలపై మరింత భారం మోపేలా చేస్తోంది" అన్నారు.

తాజుద్దీన్ మాట్లాడుతూ, "గత ఎన్నికల్లో మోదీ గారు అధికారంలోకి వస్తే నిత్యావసర వస్తువుల ధరలను తగ్గిస్తామని, పేదలకు ఆదాయం పెంచుతామని, ఉద్యోగ అవకాశాలు కల్పిస్తామని ఎన్నో హామీలు ఇచ్చారు. కానీ ఇప్పటివరకు ఒక్క హామీ కూడా అమలు కాలేదు. పైగా ఇప్పుడు ఎల్పీజీ ధరలు పెంచడం చాలా దుర్మార్గమైన పని," అని విమర్శించారు.

అంతర్జాతీయంగా క్రూడ్ ఆయిల్ ధరలు తగ్గినప్పటికీ, దేశంలో పెట్రోల్, డీజిల్, గ్యాస్ ధరలు పెరుగుతుండడం పట్ల ఆయన ఆవేదన వ్యక్తం చేశారు. "ఇది కార్పొరేట్ సంస్థల వంచనకు కేంద్ర ప్రభుత్వం చేతులెత్తి సహకరిస్తున్నదనేది స్పష్టంగా కనిపిస్తుంది" అన్నారు. పెంచిన ఎల్పీజీ ధరలను తక్షణమే వెనక్కి తీసుకోవాలని సిపిఐ డిమాండ్ చేస్తోంది.

ఈ కార్యక్రమంలో సిపిఐ జిల్లా కార్యవర్గ సభ్యులు ఎం.షఫీ, రజినీ, సాదిక్ అలీ, లింగం, మైబెల్లి ఎం.రమేష్, శ్రామిక మహిళా కార్యదర్శి అనుసుయ యాదవ్, రైతు మహిళా కార్యదర్శి బుజ్జమ్మ, తస్లీమ్, రాజమ్మ, శంకరమ్మ తదితరులు పాల్గొన్నారు.